Star People

Star People (2025)

IMDb Rating (4.5) / Rotten Tomatoes (80%)

Star People (2025) ကတော့ Sci-Fi Thriller နဲ့ Drama အမျိုးအစားကို ပေါင်းစပ်ထားတဲ့ ဇာတ်ကားလေးပါ။ သာမန် ဂြိုဟ်သားကားတွေလိုမျိုးချည်းပဲတော့ မဟုတ်ဘူး။ ဒရာမာနဲ့ လက်ရှိ လူမှုရေးပြဿနာတွေကိုပါ ရောနှောတင်ဆက်ထားတာ တွေ့ရပါမယ်။

ဇာတ်လမ်းအကျဉ်းချုပ်

၁၉၉၇ ခုနှစ်တုန်းက အမေရိကန်မှာ တကယ်ဖြစ်ခဲ့တဲ့ Phoenix Lights ဆိုတဲ့ နာမည်ကြီး UFO မြင်တွေ့ရမှုကြီးကို အခြေခံထားတာပါ။ အဲဒီတုန်းက ကလဲယား (Claire) ဆိုတဲ့ ၁၀ နှစ်အရွယ် ကောင်မလေးက အဲဒီအလင်းရောင်တွေဟာ သူ့ကို ခေါ်နေတယ်လို့ ခံစားခဲ့ရတယ်။

နှစ်တွေတော်တော်ကြာလာတဲ့အခါ ကလဲယားက ဓာတ်ပုံဆရာမ တစ်ယောက်ဖြစ်လာတယ်။ တစ်နေ့တော့ ငယ်ငယ်က သူတွေ့ခဲ့တဲ့ UFO တွေအကြောင်း အဖြေရှာနိုင်မယ့် သတင်းတစ်ခုကို သူရလိုက်တယ်။ အဲဒါနဲ့ သူ့ရဲ့ ကောင်လေးဖြစ်သူ နာမည်ကြီးချင်နေတဲ့ ဂျစတင် (Justin) ရယ်၊ မူးယစ်ဆေးပြဿနာရှိနေတဲ့ သူ့အစ်ကို တေလာ (Taylor) ရယ်နဲ့အတူ အယ်ရီဇိုးနား ကန္တာရထဲကို ခရီးထွက်လာကြတယ်။

ကန္တာရထဲမှာ အပူချိန်တွေကလည်း အရမ်းပြင်းထန်နေတဲ့အချိန်၊ သူတို့ မျှော်လင့်မထားတဲ့ ဧည့်သည်တွေနဲ့ ဆုံတွေ့ရပါတော့တယ်။ နယ်စပ်ဖြတ်ကျော်လာပြီး ပုန်းရှောင်နေရတဲ့ ဒုက္ခသည် သားအဖနှစ်ယောက်နဲ့ ဆုံမိတဲ့အခါ ကလဲယားရဲ့ UFO လိုက်ရှာတဲ့ ခရီးစဉ်ဟာ လမ်းကြောင်းပြောင်းသွားပါတော့တယ်။ ဂြိုဟ်သားတွေအကြောင်း ရှာဖွေရင်းကနေ လူသားချင်းစာနာမှု၊ မိသားစု သံယောဇဉ်နဲ့ လူဝင်မှုကြီးကြပ်ရေးလိုမျိုး လက်ရှိလူမှုအသိုင်းအဝိုင်းက ပြဿနာတွေကိုပါ တွေးတောစရာဖြစ်လာအောင် ရိုက်ကူးထားတာပါ။

ဒီကားက ရုပ်ထွက်နဲ့ Cinematography ပိုင်း တော်တော်လေး လှတယ်။ ကန္တာရရှုခင်းတွေ၊ ညဘက် ကောင်းကင်ပြကွင်းတွေကို သေသေချာချာ ရိုက်ပြထားတယ်။ အက်ရှင်တွေ၊ ဂြိုဟ်သားတွေ အများကြီး ပါလာမယ့် Sci-Fi မျိုးကိုပဲ သီးသန့်ကြီး မျှော်လင့်ထားရင်တော့ ဇာတ်အသွားအလာ နှေးလို့ နည်းနည်း ပျင်းစရာကောင်းနိုင်ပါတယ်။ ဒါပေမဲ့ ဇာတ်ကောင်တွေရဲ့ စိတ်ခံစားချက်၊ သရုပ်ဆောင်တွေရဲ့ အိုက်တင်ပိုင်းနဲ့ အတွေးအခေါ်ပိုင်းကို သေချာလေး ခံစားကြည့်မယ်ဆိုရင်တော့ သဘောကျစရာ ကားကောင်းလေး တစ်ကားပါ။

• addiction
• arizona
• desert
• phoenix lights
• space
• stars