Every You Every Me

Every You Every Me (2024)

IMDb Rating (6.1)

သမီးနှစ်ယောက်ရဲ့ အမေ၊ တစ်ခုလပ်ဖြစ်သူ နာဒီးဟာ စိတ်ဓာတ်သန်မာတဲ့အမျိုးသမီးတစ်ယောက်ပါ။ သူမဟာ ကျောက်မီးသွေးတူးဖော်တဲ့ မိုင်းတွင်းက ယာဉ်တွေကို ပြင်ပေးရတဲ့ ကုမ္ပဏီတစ်ခု အလုပ်လုပ်ကိုင်နေသူပါ။ ဒါပေမဲ့ ကျောက်မီးသွေးသုံးစွဲမှုကို တစ်ဆင့်ချင်း ရပ်တန့်တော့မဲ့ စီမံချက်ကြောင့် သူတို့အလုပ်သမားတစ်စု အခက်တွေ့လာရပါတော့တယ်။

ကုမ္ပဏီရဲ့ဖွဲ့စည်းတည်ဆောက်ပုံကို ပြန်ပြင်တော့မဲ့ သူတို့သူဌေးရဲ့အစီအစဉ်ကြောင့် သူတို့တစ်တွေဟာ လစာဖြတ်တောက်ခံရခြင်း သို့မဟုတ် အလုပ်မှ ထုတ်ပယ်ခံရခြင်းတို့ကို ရင်ဆိုင်ရပါတော့မယ်။ အလုပ်သမားခေါင်းဆောင်အဖြစ် တာဝန်ယူထားသည့် နာဒီးအနေနဲ့ သူဌေးနဲ့ လုပ်ဖော်ကိုင်ဖက်များကြား ညှိနှိုင်းရင်း ခေါင်းရှုပ်ရပါတော့တယ်။ လက်မထပ်ရသေးတဲ့ သူမရဲ့အတူနေချစ်သူ ပေါလ်ဟာလည်း သူမရဲ့သမီးတွေအပေါ် ဖခင်အရင်းသဖွယ် သူမထက်ပို၍ အကြင်နာထား စောင့်ရှောက်တတ်သူပါ။

သိုပေမဲ့ အလုပ်ထုတ်ခံထားရသည့် ပေါလ်ဟာ အလုပ်အသစ်တွေ ဘယ်လောက်လျှောက်လျှောက် အင်တာဗျူးဖြေချိန်ရောက်ရင် ပြဿနာဖြစ်တတ်သူပါ။ ထိုပြဿနာတွေကလည်း နာဒီးကိုယ်တိုင် ကိုင်တွယ်ဖြေရှင်းမှ ပြေလည်မဲ့အရာတွေချည်း ဖြစ်ပါတယ်။ ဒါ့ကြောင့် မိသားစုနဲ့ အလုပ်အကြား တစ်ယောက်တည်း ဦးဆောင်ရုန်းကန်နေရသည့် နာဒီးတစ်ယောက် စက်ရုပ်တစ်ခုလို ခံစားချက်တွေကင်းမဲ့လာပါတော့တယ်။ သမီးဖြစ်သူတွေအပေါ် မေတ္တာမပေးနိုင်၊ ချစ်သူဖြစ်သူအပေါ် အချစ်စိတ်တွေကုန်ခမ်းလာပါတော့တယ်။

ဖိအားတွေကြောင့် သူမရဲ့ စိတ်အလိုမကျဖြစ်နေပုံကို ဇာတ်ကားထဲမှာတော့ ပေါလ်အပေါ် သူမကြည့်လိုက်တဲ့အခါတိုင်း မတူညီတဲ့ လူပုဂ္ဂိုလ်တွေအဖြစ် မြင်နေရပုံနှင့် ပမာပြုရိုက်ကူးထားပါတယ်။ ဒီဇာတ်ကားလေးဟာ လုပ်ငန်းခွင်မှာ ကြိုးစားသလောက် မိသားစုနဲ့ အချစ်ဘဝကျရှုံးနေတဲ့ပုံကို ရိုက်ကူးထားခြင်းဖြစ်ပါတယ်။ နာဒီးတစ်ယောက် ဒီဝဲဂရက်ထဲက လွတ်နိုင်ပါ့မလား၊ ဘယ်လိုတွေဆက်ဖြစ်မလဲဆိုတာကို ဆက်လက်ကြည့်ရှုလိုက်ပါခင်ဗျာ။