Don’t Blink

Don’t Blink (2014)

IMDb Rating (4.9) / Rotten Tomatoes (22%)

သူငယ်ချင်းအုပ်စုတစ်စုဟာ လူသူမနီးတဲ့တောင်ပေါ်အပန်းဖြေစခန်းတစ်ခုကို စနေတနင်္ဂနွေအားလပ်ရက်အတွက်အပန်းဖြေဖို့ ရောက်ရှိလာကြပါတယ်။ သူတို့တွေထဲမှာ ချစ်သူရည်းစားအတွဲတွေ၊ ပြတ်စဲပြီးကာစ နောက်တစ်ယောက်နဲ့တွဲခုတ်လာသူတွေစသဖြင့် ပတ်သက်ပုံအမျိုးမျိုးနဲ့ ဇာတ်လမ်းကိုယ်စီရှိကြတဲ့သူတွေပါ။

သူတို့တွေရောက်ရှိလာချိန်မှာ အပန်းဖြေစခန်းတစ်ခုလုံး လူသူကင်းမဲ့နေပြီး ကျန်နေခဲ့တဲ့ပစ္စည်းပစ္စယတွေကိုကြည့်ခြင်းအားဖြင့် အားလုံးဟာ ရုတ်တရက်ထထွက်သွားတဲ့ပုံစံပေါက်နေပါတယ်။ စားလက်စအစားအသောက်တွေ၊ မဖြေရသေးတဲ့အထုပ်အပိုးတွေဟာ ဒီအတိုင်းကျန်နေရစ်ခဲ့တာပါ။

အဲ့ဒီလိုနဲ့ လူသူရှိလိုရှိငြားနေရာအနှံ့လျှောက်ရှာရင်း ပိုထူးခြားတဲ့ အနေအထားတွေကိုတွေ့လာရပါတယ်။ အဲ့ဒါကတော့ ပူပြင်းတဲ့ကာလမှာ ရေကန်ကြီးက ရေခဲနေတာ၊ ငှက်တွေကအစအင်းဆက်တွေအဆုံး ဘယ်လိုသက်ရှိသတ္တဝါမျိုးကိုမှ မတွေ့ရတာတွေပါပဲ။

အဲ့ဒါတွေကြောင့် လှည့်ပြန်သွားဖို့စိတ်ကူးမိပေမဲ့လည်း ဆီပန့်တွေအကုန်ပိတ်နေသလို သူတို့ကားတွေမှာလည်းဆီမရှိတော့ပါဘူး။ တဖြည်းဖြည်းခြောက်ခြားလာတဲ့သူတို့အုပ်စု တကယ်တမ်းမှာ ရင်ဆိုင်ရမဲ့အန္တရာယ်တွေက အစပဲရှိပါသေးတယ်။

Don’t Blink ဟာ မြင်နေကျဟော်ရာဇာတ်ကားတွေလို သွေးထွက်သံယိုမြင်ကွင်းတွေ၊ ဗီလိန်ဇာတ်ကောင်စစ်စစ်တွေမပါဝင်ဘဲ ခြောက်ခြားစေရုံသာမက အတွေးနယ်ချဲ့စရာ ဟော်ရာကားကောင်းတစ်ကားဖြစ်ပါတယ်။