Children Who Chase Lost Voices

Anime လောကမှာ ဆရာတစ်ပါးဖြစ်တဲ့ Makoto Shinkai ကို နာမည်မကြားဘူးရင်တောင် Your Name တို့ Weathering With You တို့ကို သိကြလိမ့်မယ် ထင်ပါတယ်။ အခုရုပ်ရှင်လေးကဒီဆရာသမားရဲ့ 2011 ထွက် ရုပ်ရှင်ကားလေးပဲ ဖြစ်ပါတယ်။

ဒီတော့ ဇာတ်လမ်း ဇာတ်ညွန်းရိုက်ချက် နောက်ခံတေးဂီတတွေ ပြောစရာမလိုအောင်ကောင်းမယ်ဆိုတာ သိပြီးသားဖြစ်မှာပါနော်။

ဇာတ်လမ်းအကျဉ်းလေးကတော့ Asuna ဆိုတဲ့ကျောင်းသူ‌လေးကစာတော်တဲ့ စာဂျပိုး‌ ကလေးမလေးပါ။ အဖေဖြစ်သူကဆုံးပါးသွားပြီး အမေဖြစ်သူက သူနာပြုအလုပ်တစ်ဖက်နဲ့ Asuna ကိုအချိန်မပေးနိုင်ပါဘူး။ ဒီတော့ Asuna ဟာ ညနေဆိုရင် Mimi ဆိုတဲ့ ကြောင်လေးတစ်ကောင်နဲ့ တောင်ကုန်းတစ်ခုပေါ်တက်ပြီးအဖေလက်ဆောင်ပေးခဲ့တဲ့ အသံလှိုင်းဖမ်းရေဒီယိုလေးနားထောင်လေ့ရှိပါတယ်။ တစ်နေ့မှာတော့သူမတစ်ခါမှမကြားဖူး‌ပေမဲ့ ရင်ထဲမှာစွဲကျန်နေခဲ့တဲ့ သံစဉ်တစ်ခုကိုကြားလိုက်ရပြီး အဲဒီအကြောင်းပဲတွေးနေမိတယ်။

နောက်ရက်မှာတော့ Asuna တို့မြို့ထဲမှာ ဝက်ဝံလိုအကောင်ကြီးလွတ်နေတယ်ဆိုပြီး သတင်းတွေပျံ့နေပါတော့တယ်။ ဒါကြောင့် ညနေကျောင်းဆင်းချိန်မှာပဲ Asuna နဲ့ အဲဒီအကောင်ကြီးထိပ်တိုက်တွေ့တဲ့အချိန် Shun လို့ခေါ်တဲ့ကောင်လေးက ကယ်တင်ပေးလိုက်ပြီး နှစ်ဦးသားရင်းနှီးသွားကြပါတယ်။ နောက်တစ်ရက်မှာတော့ ချိန်းထားပေမဲ့ကောင်လေးကပေါ်မလာပါဘူး။ Asuna ကျောင်းဆင်းချိန်ရောက်တော့ Shun သေသွားပြီဆိုတဲ့သတင်းကြားလိုက်ရပါတယ်။

Asuna ရဲ့ကျောင်းမှာလည်း အစားထိုးဆရာတစ်ယောက်ရောက်လာပြီး မြေအောက်ကမ္ဘာအကြောင်းကိုသင်ခန်းစာထဲထည့်သင်သွားတဲ့အချိန် Asuna မှာ နားလည်ရခက်တဲ့ ပုစ္ဆာတွေကို သိချင်တာတွေရှိလာတော့တယ်။ အဲဒီနောက်မှာ Asunaဟာ မြေအောက်လောက (မရဏလောက) ကိုခရီးသွားဖို့ အကြောင်းဖန်လာပါတော့တယ်။ Shun က တကယ်ပဲသေသွားပြီလား အစားထိုးဆရာကရော တကယ်ပဲဆရာတစ်ယောက်လား။ Asuna တစ်ယောက်ဘယ်လိုစွန့်စားခန်းတွေကြုံရမလဲဆိုတာကို Emotional Scenes ကောင်းကောင်းလေးတွေနဲ့တွေ့မြင်ရမှာပါ။

လူတိုင်းဟာ တစ်ရက်မှာထွက်ခွာသွားရမှာ လောကနိယာမပါပဲ။ အမြဲအတူရှိနေမယ်ထင်ထားတဲ့သူတွေကတောင် ထွက်ခွာသွားရမဲ့အချိန်တန်ရင် အနားကနေစွန့်ခွာသွားတာကို လက်မခံနိုင်လဲလက်ခံရမှာပါ။ ဒီသဘောတရားကို ကောင်းကောင်းကြီးပုံဖော်ထားတဲ့ ဇာတ်လမ်းကောင်းလေးတစ်ခုဖြစ်လို့ကြည့်ရှုခံစားဖို့ ဖိတ်ခေါ်လိုက်ပါရစေရှင်။

• adult animation
• adventure
• anime
• female protagonist
• life and death
• rescue mission
• spirit
• supernatural